காஞ்சிபுரம் கந்தப்பர் கோயிலில் மகா கும்பாபிஷேகம்: காஞ்சி சங்கராசாரியர் முன்னிலையில் கோலாகலம்!

 

காஞ்சிபுரம், ஜூன் 24:

காஞ்சிபுரம் அப்பாராவ் தெருவில் அமைந்துள்ள மிகவும் புகழ்பெற்ற வள்ளி, தேவசேனா சமேத கந்தப்பர் கோயிலில் புதன்கிழமை நடைபெற்ற மகா கும்பாபிஷேக விழாவினைக் காஞ்சி சங்கராசாரியர் ஸ்ரீ விஜயேந்திர சரஸ்வதி சுவாமிகள் நேரில் கலந்துகொண்டு நடத்தி வைத்தார்.

அஸ்திவாரம் உயர்த்தப்பட்டுப் புதுப்பொலிவு

இக்கோயிலில் முருகப்பெருமான் மயிலின் மீது ஆறுமுகத்துடனும், 12 கரங்களுடனும் ஷண்முகராக வள்ளி, தெய்வானையுடன் மூலவராகத் தெற்கு திசை நோக்கிப் பக்தர்களுக்கு அருள்பாலித்து வருகிறார். இக்கோயில் மிகவும் பள்ளமான பகுதியில் இருந்ததால், மழைநீர் தேங்குவதைத் தவிர்க்கும் பொருட்டு, காஞ்சிபுரம் அக்சயம் அறக்கட்டளை சார்பில் அஸ்திவாரத்திலிருந்து 6 அடி உயரம் மேலே உயர்த்தப்பட்டு, திருப்பணிகள் முழுமையாகச் செய்யப்பட்டுப் புதுப்பிக்கப்பட்டது.

யாகசாலை பூஜைகள் முதல் மகா கும்பாபிஷேகம் வரை

மகா கும்பாபிஷேகத்திற்கான ஆன்மீகச் சடங்குகள் மற்றும் யாகசாலை பூஜைகள் கடந்த ஜூன் 21-ஆம் தேதி வி.சண்முகம் குருக்கள் மற்றும் ஆர்.மகேஷ் சிவாச்சாரியார் ஆகியோர் தலைமையில் கணபதி பூஜையுடன் விமரிசையாகத் தொடங்கியது.

தொடர்ந்து புதன்கிழமை காலை, இறுதி கால யாகசாலை பூஜைகள் நிறைவு பெற்று மகா பூரணாகுதி தீபாராதனை நடைபெற்றது. அதனைத் தொடர்ந்து, மங்கள வாத்தியங்கள் முழங்கப் புனிதநீர் அடங்கிய கலசக் குடங்கள் புறப்பட்டு, மூலவர் விமானக் கோபுரம் மற்றும் ராஜகோபுரங்களுக்குக் கொண்டு செல்லப்பட்டன.

குடமுழுக்கை நடத்தி வைத்த காஞ்சி பரமாசாரியர்

காலை 11.30 மணி தட்டுகையில், காஞ்சி சங்கர மடத்தின் பீடாதிபதி ஸ்ரீ விஜயேந்திர சரஸ்வதி சுவாமிகள் முன்னிலையில், கோபுரக் கலசங்களுக்குப் புனிதநீர் ஊற்றப்பட்டு மகா கும்பாபிஷேகம் மிக விமரிசையாக நடத்தி வைக்கப்பட்டது. அப்போது கூடிமிருந்த ஆயிரக்கணக்கான பக்தர்கள் "முருகனுக்கு அரோகரா..." எனப் பக்தி முழக்கமிட்டுச் சுவாமி தரிசனம் செய்தனர்.

முன்னதாக, ஆலயத்தின் முன்பாக புதிதாகப் புதுப்பிக்கப்பட்ட கற்பக விநாயகர் ஆலயத்துக்கும் மகா கும்பாபிஷேகம் நடைபெற்றது. கும்பாபிஷேகம் நிறைவடைந்ததும், மூலவர் கந்தப்பர் மற்றும் பரிவார தெய்வங்களுக்கு மகா சிறப்பு அபிஷேகங்களையும், தீபாராதனைகளையும் ஆலய அர்ச்சகர்கள் வி.கிட்டப்பா மற்றும் ஏ.சதீஷ் சிவாச்சாரியார் ஆகியோர் முறைப்படி நடத்தினார்கள்.

விழாவின் நிறைவாக, ஆலய நிர்வாகத்தின் சார்பில் கும்பாபிஷேகத்திற்கு வந்திருந்த ஆன்மீகப் பக்தர்கள் அனைவருக்கும் பெரும் அளவில் அன்னதானமும் பிரசாதமும் வழங்கப்பட்டது.