வாக்கியப் பஞ்சாங்கத்தின்படி டிச.20ம் தேதி (புதன்கிழமை) மாலை 5.23க்கு மகர ராசியில் இருந்து கும்ப ராசிக்கு பெயர்ச்சி ஆனார் சனி பகவான்.
நன்மை பெறும் ராசிகள், நன்மை தீமை கலந்து பெறும் ராசிகள், பரிகாரத்தின் மூலம் பயன்பெறும் ராசிகள் எவையென ஜோதிடர் பெருங்குளம் ராமகிருஷ்ணன் கணித்து வழங்கியுள்ளார்.
நிகழும் மங்களகரமான ஸ்வஸ்தி ஸ்ரீசோபக்ருத் வருஷம் தட்சிணாயணம் ஹேமந்த ரிது மார்கழி மாதம் 04ம் நாள் இதற்குச் சரியான ஆங்கில தேதி 20.12.2023 அன்றைய தினம் தினசுத்தி அறிவது புதன்கிழமை - உத்திரட்டாதி நக்ஷத்ரமும் - சித்தயோகமும் - வ்யதீபாத நாமயோகமும் - பவ கரணமும் கூடிய சுபயோக சுபதினத்தில் உதயாதி நாழிகை 27.13க்கு - மாலை 5.23க்கு ரிஷப லக்னத்தில் சனி பகவான் மகர ராசியிலிருந்து கும்ப ராசிக்கு (வாக்கியப் பஞ்சாங்கப்படி) ஆட்சியாக மாறினார். கும்ப ராசிக்கு வரும் சனி பகவான் தொடர்ந்து 2 1/2 வருட காலத்திற்கு இந்த ராசியில் சஞ்சாரம் செய்து அருளாசி வழங்குவார்.
- சனி பார்வை விழும் ராசிகள்
கும்ப ராசியில் இருந்து தனது மூன்றாம் பார்வையால் மேஷ ராசியையும்
ஏழாம் பார்வையால் சிம்ம ராசியையும்
பத்தாம் பார்வையால் விருச்சிக ராசியையும் பார்க்கிறார்.
- ஸ்தான பலம்
சனி பகவானுக்கு பார்வை பலத்தை விட ஸ்தான பலமே அதிகம். அதாவது பார்க்கும் இடத்தின் பலத்தினை விட இருக்கும் இடத்தின் பலமே அதிகம்.
நவக்கிரகங்களில் கர்ம கிரகம் - தொழில் கிரகம் வாழ்வில் அனைத்து விதமான நல்ல விஷயங்களையும் அளிப்பவர் - சூரியனின் மகன் மந்தன் என்று அழைக்கப்படும் சனி பகவான் அழைக்கப்படுகிறார்.
- ஆயுள் - தொழில் - கர்மா கிரகம்
சனி கிரகம் மனிதர்களுக்கு மட்டுமல்லாமல் உலகத்தில் இருக்கக்கூடிய அனைத்து வித கர்மாக்களுக்கும் காரகன். நம் வாழ்வில் முக்கியமான விஷயங்கள் - ஆயுள், தொழில், கர்மா. இம்மூன்றிக்கும் அதிபதி அதாவது காரகன் சனியாவார். ஒருவருடைய ஜாதகத்தில் ஆயுள் ஸ்தானாதிபதி பலம் குன்றியிருந்தாலும் சனீஸ்வர பகவான் பலமாக இருந்தால் ஆயுள் தீர்க்கம் என்று சொல்லலாம்.
சனி பகவானுக்குரிய ஆதிக்கம் பெற்ற விஷயங்கள்: உழைப்பு, சமூக நலம், தேசத் தொண்டு, புதையல், தலைமை தாங்கும் வாய்ப்பு, உலகியல் அறிவு, பல மொழிகளில் பாண்டித்யம், விஞ்ஞானத்தில் தேர்ச்சி, எண்ணைக் கிணறு, பெரிய இயந்திரங்கள் போன்றவற்றிற்கு காரகத்துவம் கொடுப்பவர். கிரக வரிசையில் ஆறாவதாக வருபவர். கிழமைகளில் சனிக்கிழமைக்கு ஆதிக்கம் செலுத்துபவர். அளவின் அடிப்படையில் குருவிற்கு அடுத்த பெரிய கிரகம் சனி கிரகமாகும்.
- சனியின் பலம்
சனி எந்த ஸ்தானத்தை பார்க்கிறாரோ அந்த ஸ்தானம் சிறிது காலத்திற்குப் பிறகு பலமும், விருத்தியும் அடைகிறது.
சனிக்கு 3, 7, 10 ஆகிய பார்வைகள் உள்ளன. அதாவது சனி தான் இருக்கும் இடத்தில் இருந்து 3, 7, 10 ஆகிய இடங்களைப் பார்வையிடுகிறார்.
மூன்றாம் பார்வையும், பத்தாம் பார்வையும் சிறப்புப் பார்வைகளாகும்.
பொதுவாக ராசிகள் பெறும் பலன்களின் அளவுகள்:
- நன்மை பெறும் ராசிகள்:
மிதுனம் - கன்னி - துலாம் - தனுசு
- நன்மை தீமை இரண்டும் கலந்து பலன்கள் பெறும் ராசிகள்:
மேஷம் - ரிஷபம்
- பரிகாரத்தின் மூலம் பயன்பெறும் ராசிகள்:
கடகம் - சிம்மம் - விருச்சிகம் - மகரம் - கும்பம் - மீனம்