.png){kind=logo}
மார்கழி நோன்பு - ஆறாம் நாள்:
திருப்பாவையின் ஆறாம் பாடலில், உறங்கும் தோழியை எழுப்ப இயற்கையையும், இறைவனின் லீலைகளையும் சான்றாகக் காட்டுகிறார் ஆண்டாள் நாச்சியார். அதிகாலையின் அமைதியை உடைக்கும் பறவைகளின் ஒலியும், கோயிலில் எழும் சங்கு முழக்கமும் இறைவனை வழிபட நம்மை அழைக்கின்றன.
பாடல்:
புள்ளும் சிலம்பின காண் புள்ளரையன் கோயிலில்
வெள்ளை விளிசங்கின் பேரரவம் கேட்டிலையோ?
பிள்ளாய் எழுந்திராய்! பேய்முலை நஞ்சுண்டு
கள்ளச் சகடம் கலக்கழியக் காலோச்சி
வெள்ளத்து அரவில் துயிலமர்ந்த வித்தினை
உள்ளத்துக் கொண்டு முனிவர்களும் யோகிகளும்
மெள்ள எழுந்து அரியென்ற பேரரவம்
உள்ளம் புகுந்து குளிர்ந்தேலோர் எம்பாவாய்
பாடலின் உட்பொருள்:
"அன்புத்தோழியே! விடிந்துவிட்டதற்கான அடையாளங்கள் சூழ்ந்தும் நீ இன்னும் உறங்குவது ஏனோ? பறவைகள் கீச்சிடும் ஒலியும், கருட வாகனனான அந்தப் பரந்தாமனின் கோயிலில் எழும் வெண்சங்கின் முழக்கமும் உன் காதுகளில் விழவில்லையா?
தன்னைக் கொல்ல வந்த பூதகி என்ற அரக்கியின் நஞ்சைக் குடித்து அவளுக்கு மோட்சம் அளித்தவனும், சக்கர வடிவில் வந்த சகடாசுரனை ஒரு காலால் உதைத்து அழித்தவனுமான அந்த 'தாமோதரனை' முனிவர்களும் யோகிகளும் தங்கள் இதயத்தில் இருத்தி 'ஹரி... ஹரி...' என்று போற்றுகிறார்கள். அந்தப் பேரொலி நம் உள்ளத்தைப் குளிரச் செய்கிறது. உடனே எழுந்து வா!" என்று ஆண்டாள் அழைக்கிறார்.
தத்துவ விளக்கம்: அரக்கிக்கும் மோட்சம் அளித்த கருணை!
இந்தப் பாடலில் ஒரு உன்னதமான விளக்கம் உள்ளது. கம்சனால் அனுப்பப்பட்ட பூதகி, கண்ணனைக் கொல்ல வஞ்சனையுடன் பால் கொடுத்தாள். ஆனால், அவள் பால் கொடுத்த அந்த ஒரு செயலுக்காக அவளுக்குத் 'தாய்' என்ற ஸ்தானத்தை அளித்தான் கண்ணன். அவளைத் துன்புறுத்தாமல், அமைதியாக அவளது உயிரைக் குடித்து அவளுக்கு முக்தியளித்தான். தீமை செய்ய வந்தவளுக்கும் நன்மையையே செய்த எம்பெருமானின் கருணையை இந்தப் பாடல் போற்றுகிறது.
குறிப்பு: கேரள மாநிலம் அம்பலப்புழையில் இருந்து 25 கி.மீ. தொலைவில் உள்ள திருவமுண்டூர் என்ற தலத்தைக் குறித்து ஆண்டாள் இந்தப் பாடலைப் பாடியதாகக் கருதப்படுகிறது.
#திருப்பாவை #மார்கழி #ஆண்டாள் #கண்ணன் #ஆன்மீகம் #அனுமன்ஜெயந்தி #புள்ளும்சிலம்பின #Thiruppavai #Margazhi #LordKrishna #SpiritualAwakening #Andal #TamilDevotional
